आइतबार सम्पन्न प्रतिनिधि सभा सदस्य उपनिर्वाचनमा चितवन क्षेत्र नं २ र तनहुँ १ मा रास्वपाका उम्मेदवार भारी मतान्तरसहित  विजयी भएका छन् । परम्परागत दुइ ठूला दल नेपाली कांग्रेस तथा नेकपा एमालेलाई ठूलो धक्का दिदै रास्वपा सभापति रवि लामिछाने र नेता डा. स्वर्णिम वाग्ले विजयी भएका हुन् । विजयी नेताहरुले आफुहरुको जित परम्परागत दलहरुका लागी एउटा ठुलो धक्का भएको भन्दै उनीहरु सच्चिनुको बिकल्प नरहेको बताएका छन् ।

आइतबार  सम्पन्न प्रतिनिधि सभा सदस्य उपनिर्वाचनको मतपरिणामले परम्परागत ठूला दल नेपाली कांग्रेस, एमालेलगायतलाई ठूलो धक्का दिएको छ । चितवन निर्वाचन क्षेत्र नं २ मा राष्ट्रिय स्वतन्त्र पार्टीका सभापति रवि लामिछाने ६९ प्रतिशत मत लिएर विजयी भएका छन् । लामिछानेले ५४ हजार १ सय ७६ मत ल्याउदा उनका निकटतम प्रतिस्पर्धी सत्ता गठबन्धनका साझा उम्मेदवार कांग्रेसका जीत नारायण श्रेष्ठले ११ हजार २ सय १४ र एमालेका राम प्रसाद न्यौपानेले १० हजार ९ सय ३६ मत मात्रै पाए । यसअघि ३८  हजार बढी मतान्तरसहित विजयी भएका लामिछानेले उपनिर्वाचनमा भने त्यो संख्यालाई अझै बढाउदै ४२ हजार बढी मतान्तर सहित विजयी भएका हुन् । रेकर्ड ब्रेक गर्दै भारी मतान्तर सहित दोस्रो पटक विजयी भएका सभापति लामिछानेले जनताले खोजेको भष्ट्राचार नियन्त्रण र सुशासन भएकोले आफूहरुको मुख्य जोड त्यसैमा रहने बताएका छन् । भष्टाचाररहित सरकारी संयन्त्र र जनताले अनुभूत हुने गरी सुशासन कायम गर्न लागिपर्ने उनको भनाइ छ । 

त्यस्तै तनहुँ १ मा पनि राष्ट्रिय स्वतन्त्र पार्टीकै नेता डा. स्वर्णीम वाग्ले विजयी भएका छन् । यसअघि कांग्रेसमा आवद्ध डा. वाग्ले कांग्रेसबाट टिकट नपाएपछि बिद्रोह गर्दै रास्वपा छिरेर प्रतिनिधि सभाको यात्रा तय गरेका हुन् । चार महिनाअघि भएको निर्वाचनमा कांग्रेसबाट रामचन्द्र पौडेलले फराकिलो मतान्तरले जितेको क्षेत्रमा पौडेल राष्ट्रपति निर्वाचित भएपछि आइतबार भएको उपनिर्वाचनमा भने कांग्रेसले पकड जोगाउन सकेन । ०६४र ०७४ बाहेकका सबै निर्वाचनमा जित्दै आएको कांग्रेस यस पटक भने सत्ता गठबन्धनका दलहरुको साथ पाउदा समेत नराम्ररी पराजित हुन पुगेको छ । स्थानीयस्तरमा नागरिकसँग भिजेर ग्रामीण विकासको नेतृत्व गरेका भट्टराई पहिलोपटक संसदीय निर्वाचनमा भाग लिएका थिए तर पनि उनले रास्वपा उम्मेदवार वाग्लेको पक्षमा उर्लिएको जनलहर रोक्न सकेनन् ।

तनहुँ १ मा एमालेका सर्वेन्द्र खनालले ८ हजार ४ सय ८८ मत ल्याउदा कांग्रेसका भट्टराईले २० हजार १२२ ल्याए । विजयी वाग्लेले भने ३४ हजार ९१९ मत पाए । १४ हजार मतान्तर सहित विजयी वाग्लेले एकै धक्कामा राष्ट्रिय दल बन्न सफल रास्वपा नयाँ राजनीतिक झिल्को भएर उदाएको बताएका छन् । रास्वपाले परम्परागत दलहरुलदाई सुध्रन वाध्य बनाएको उनको भनाइ छ  ।

त्यस्तै उपनिर्वाचनको परिणामलाई लिएर नेपाली कांग्रेसका सभापति शेरबहादुर देउवाले  संसदीय दलको बैठकमा उपनिर्वाचनमा पनि ठूला पार्टीप्रति जनताको त्यत्ति चासो नदेखाएको स्वीकारेका छन् । उनले  आगामी दिनमा पार्टीलाई सुधारेर जानुपर्ने आवश्यक्ता औंल्याएको कांग्रेसका नेताहरु बताउछन् ।

राजनीतिमा ऐतिहासिक विरासत जमाउँदै आएका देशका प्रमुख दुइ ठूला दल कांग्रेस र एमालेलाई भर्खरै जन्मिएर राजनीतिक मैदानमा उत्रिएको एक बर्ष पनि नभएको रास्वपाले कित सुध्रिने कि सक्किने भन्नेमा सोच्न बाध्।य बनाएको छ । यदि अब पनि ठूला भनिएका राजनीतिक दलहरु नसच्चिने र नयाँ खुलेका रास्वपालगायतका दलहरुले आफुलाइ केही फरक देखाउँदै जनताको मन जित्न सके निश्चय पनि आउदो ०८४ को निर्वाचनमा कायाँ पलट हुने निश्चित छ l