काठमाडौ ।नेपाल क्रिकेट संघ क्यानले खेलाडी सन्दीप लामिछानेलाई यूएई भ्रमणमा लैजान पहल गरिदिन नियमनकारी निकाय राष्ट्रिय खेलकुद परिषद् (राखेप) सँग आग्रह गरेको छ । सन्दीपमाथि नाबलिग जबरजस्तीकरणीको आरोप लागेको छ । उनलाई गत पुस २८ गते पाटन उच्च अदालतले २० लाख धरौटीमा ससर्त रिहा गरेको थियो । 

सन्दीपलाई विदेश जान रोक लगाइएको छ भने काठमाडौं उपत्यका छाड्दा पनि जिल्ला प्रहरी परिसर काठमाडौंबाट अनुमति लिनुपर्नेछ । काठमाडौं छाड्ने र फर्किने मिति र आफू रहेको स्थानको नामसमेत जनाउनुपर्ने आदेशमा उल्लेख छ । यही अदालतको आदेश भित्रै बसेर  नेपाल क्रिकेट संघ (क्यान) ले स्पिनर सन्दीप लामिछानेलाई आइसिसी विश्वकप लिग–२ त्रिकोणात्मक ओ.डि.आई. सिरिज खेल्न युएई लैजान प्रक्रिया अघि बढाएको हो ।

नेपाली क्रिकेट टोली शनिबार युएई प्रस्थान गर्दैछ । तर सन्दीपलाई उच्च अदालत पाटनले विदेश जान रोक लगाएकाले क्यानले राष्ट्रिय खेलकुद परिषद्(राखेप) मार्फत अदालत्ले भनेको प्रक्रिया भित्रै रहेर प्रक्रिया अघि बढाएको हो । 

मंगलबार सम्पन्न नामिबिया र स्कटल्यान्डसँगको त्रिकोणात्मक ओ.डि.आई सिरिजमा सन्दीपले ४ खेलमा १३ विकेट लिएका थिए । सन्दीपले पहिलो खेलमा नामिबियाविरुद्ध १० ओभरमा ६६ रन खर्चेर ३ विकेट लिएका थिए । दोस्रो खेलमा स्कटल्यान्डविरुद्ध १० ओभरमा २७ रन खर्चेर ३ विकेट लिएका थिए । तेस्रो खेलमा सन्दीपले नामिबियाविरुद्ध १० ओभरमा ४६ रन खर्चेर ३ विकेट लिएका थिए । स्कटल्यान्डविरुद्ध १० ओभरमा ४५ रन खर्चेर ४ विकेट लिएका थिए ।

नेपालले पहिलो पटक लिग २ मा सबै चारै खेलमा जित हात पारेको छ भने युएईमा हुने लिग टु अन्तर्गत्को खेल नेपालका लागि अन्तिम तथा निर्णायक समेत हो । जहाँ नेपालले युएई र पपुवा न्युगिनीसँग दुई दुई खेल खेल्नेछ । त्यसपछि घरेलु मैदान मै पुनः युएई र पपुवा न्युगिनीसँग समान दुई खेल खेल्नु पर्नेछ । नेपाललाई आ.ेडि.आई मान्यता बचाउन ८ मध्य पाँच खेल जित्नै पर्ने दवाव छ । यस्तै शीर्ष तीनमा रहेको अवस्थामा नेपालले सोझै विश्वकप छनोट खेल्न सक्छ तर यसका लागि सबै खेल जित्नुपर्ने हुन्छ । यसका लागि सन्दिपको पुनरागमन निकै महत्वपूर्ण देखिएको छ ।

बलात्कार आरोपमा पक्राउ पुर्जी जारी भएपछि क्यानले सन्दीपलाई भदौ २३ मा निलम्बन गरेको भएपनि उक्त निलम्बन माघ १७ गतेको  बोर्ड बैठकले हटाएको थियो । माघ १९ देखि सन्दीपलाई नेपाली टोलीको क्याम्पमा राखेको क्यानले माघ २६ गते सन्दीपलाई समेट्दै नेपाली टोली घोषणा गरेको थियो ।