सन्दीप लामिछानेलाई थुनामै राख्न माग गर्दै सर्वोेच्चमा रिट दर्ता

काठमाडौं । क्रिकेटर सन्दीप लामिछानेलाई थुनामै राख्न माग गर्दै सर्वोच्च अदालतमा रिट दर्ता भएको छ । बिहीबार महान्यायाधिवक्ता कार्यालयको तर्फबाट सर्वोच्चमा रिट दर्ता भएको हो । 

क्रिकेटर सन्दीप लामिछानेले एक नाबालिगलाई जबरजस्ती करणी गरेको भन्दै गत भदौ २१ गते परेको जाहेरीका आधारमा कात्तिक १४ गते काठमाडौं जिल्ला अदालतमा लामिछानेविरुद्ध जबरजस्ती करणीको कसुरमा मुद्दा दर्ता भएको थियो । काठमाडौं जिल्ला अदालतले तत्काल प्राप्त प्रमाणबाट कसुरदार देखिएको भन्दै लामिछानेलाई थुनामै राखेर मुद्दाको पुर्पक्ष गर्नु पर्ने आदेश दिएको थियो । 

तर लामिछाने पक्षका वकिलहरुले भने पीडित भनिएकी किशोरीमाथि जबरजस्ती करणी नभएको दावी गर्दै आएका छन् । किशोरीमाथि जबरजस्ती करणी नभएको र किशोरी पनि नाबालिग नभई उमेर पुगिसकेको दावी गरिएको छ । किशोरीको ठेगाना रहेको स्थानीय तहले किशोरीको जन्ममिति २०६१ असार १८ गते रहेको कागजात काठमाडौं जिल्ला अदालतमा पठाइसकेको छ । 

यही तथ्य र कारणबाट अभियुक्तलाई थुनामै राखी मुद्दाको पुर्पक्ष गर्न आवश्यक नरहेको भन्दै उच्च अदालत पाटनले गत पुष २८ गते लामिछानेसँग २० लाख धरौटी माग गरी तारेखमा छाड्ने आदेश गरेको थियो ।

लामिछानेलाई थुना बाहिरबाटै मुद्दा लड्ने गरी धरौटीमा छाड्ने आदेश दिएको भएपनि उच्च अदालतले शर्त सहितको आदेश जारी गरेको थियो । आदेशमा लामिछानेले देश छाड्न नपाउने र उपत्यकाबाट बाहिर जानु परेमा जिल्ला प्रहरी परिसर काठमाडौंको अनुमति लिएर मात्रै जानुपर्ने शर्त तोकेको थियो । 

तर उच्च अदालत पाटनले धरौटीमा छाड्ने गरी गरेको आदेश बेरितको भएको र प्रमाणको उचित मूल्यांकन नभएको भन्दै उक्त आदेश बदर गर्न माग गरी महान्यायाधिवक्ता कार्यालय सर्वोच्च अदालत पुगेको हो ।

बिहीबार दर्ता भएको रिट निवेदनमा सन्दीमाथि जघन्य कसुरको अभियोग लागेको र जिल्ला अदालतले तत्काल प्राप्त प्रमाणबाट कसुरदार देखिने भनी व्याख्या गरी थुनामा पठाएकामा उच्च अदालत उदार भएको भन्दै धरौटीमा छाड्ने आदेश बेरितको भएको दावी लिइएको छ । लामिछानेमाथि लागेको कसुरमा निजलाई १० देखि १२ वर्षसम्मको कैद सजाय हुन सक्ने भन्दै यस्तो अवस्थामा धरौटीमा छाड्न नमिल्ने जिकिर लिइएको छ । 

पीडितले आफ्नो रिट निवेदनमा असभयुक्तले पटकपटक बलात्कार गरेको र आफूमाथि कुटपीटसमेत भएको भन्दै जाहेरी दिएकामा अभियुक्त बाहिर निस्कँदा पीडित र समाजमा त्रासको अवस्था आउने जिकिर लिइएको छ । हेर्नुहोस् सन्दीपलाई थुनामै राख्न माग गर्दै दायर गरिएको रिट निवेदनको पूर्ण पाठ...।